Фото: rezeknesnovads.lv
Nu 2. maja da 12. septembram ir izsludynuots Nikodema Rancāna konkurss izcyluokajim Latgolys regiona školuotuojim. Nūslāguma pasuokums itūgod nūtiks Viļānu kulturys nomā 24. septembrī. Ir aizritiejs kuortejais vuiceibu gods školuos i augstškoluos. Tys nūteikti ir bejs boguots ar dažaidim nūtykumim, jaunim konkursim, projektim i sasnāgumim, partū školys vadeibai, školānu pošpuorvaļdei voi vacuoku komisejai tik viņ juoizavielej, kurs nūtykums ir bejs svareiguokais, nūzeimeiguokais deļ bārnu. Kurs pedagogs, nasaverūt iz īsuoktajom i vēļ gaidamajom reformom, ir paspiejs puorsteigt ar sovu veikumu kai školānus, tai koleģus.
Atguodynojam, ka N. Rancāna konkursa bolvu ir īdybynuojuse Latgalīšu kulturys bīdreiba (LKB), a konkursa reikuošonu atbolsta Kulturys ministreja Latvejis symtgadis programma, realizej Rēzeknis Tehnologeju akademeja (RTA) sadarbeibā ar LKB i Latgolys pošvaļdeibom. Pyrmais konkursa nūslāgums nūtyka Rēzeknis Tehnologeju akademejā, ūtrais – Ludzys Tautys nomā.
Konkursam var pīteikt pedagogus četruos nominacejuos: 1) par latgalīšu volūdys, kulturys viesturis, nūvodvuiceibys populariziešonu i īvīsšonu vuiceibu voi studeju vidē, 2) par inovativu metodikys lītuojumu apvuiceibys procesā, 3) par myusdīneigu un rodūšu pīeju školānu dorba tykuma audzynuošonai un omotu apvuiceibai, 4) par veiksmeigu pedagoga debeju (na vairuok kai pedagogim ar 3 godu darba stažu). Vaira informacejis var meklēt RTA i LKB sātys lopuos konkursa nūlykumūs. Aizpiļdeitys dasacejumu anketys ir gaideitys da 12. septembram (ilga.suplinska@rta.lv)
Vielejūt školuotuojim radūšu atpyutu vosorā, aicynojam suokt vuiceibu godu ar breineigu nūtykumu, sasateikūt N. Rancāna konkursa nūslāguma pasuokumā Viļānūs.
|
